«Turkiston Sayyidlari va Eshonlari» xalqaro jamiyati raisi ustoz Sayyid Sardorxon Jahongir Yaqin Sharq mamlakatlarida xizmat safarida bo‘lib turibdilar.
Islomshunoslik fanlari bo‘yicha Phd doktori, naqib al-ashraf Sayyid Sardorxon Jahongir arab va islom dunyosida mashhur ulamo Shayx Muhammad Avvoma hafizahulloh ziyoratida bo‘ldilar. U kishiga Markaziy Osiyoda yagona bo‘lgan «Turkiston Sayyidlari va Eshonlari» xalqaro tashkiloti tomonidan amalga oshirilgan ilmiy-tadqiqotlar natijalari, ulug‘ avliyo zotlarning nasab shajaralari va irshod silsilalari haqida ma’lumotlar berdilar. Shayx Muhammad Avvoma hazratlari qadimiy qo‘lyozmalardan biri bilan tanishib chiqdilar.
Shayx Muhammad Avvoma hazratlari Markaziy Osiyoda «Turkiston Sayyidlari va Eshonlari» xalqaro Naqobat tashkiloti o‘z faoliyatini samarali olib borayotganidan juda mamnun bo‘ldilar hamda bu boradagi fikr-mulohazalari va qimmatli maslahatlarini berdilar. Xalqaro tashkilotning kelgusi ilmiy faoliyatlarida ulkan muvaffaqiyatlar va samimiy tilaklarni tilab duoi-fotihalar qildilar.
Shayx Muhammad Avvoma hafizahulloh - to‘liq ismlari Abu Fazl Muhammad ibn Muhammad ibn Abdulqodir ibn Umar ibn Aliy Avvoma an-Nu’aymiy al-Husayniydir. Muhammad Avvoma hafizahulloh milodiy 1940 yili 1 yanvarda Suriyadagi Halab shahrining mashhur «Bobul Maqom» mahallasida dunyoga kelganlar. Muhammad Avvoma hazratlari diniy ma’rifatli muhitda yashaganlar. Birinchi bo‘lib otalarining qalin do‘sti, fazilatli shayx, faqih, taqvodor zot Muhammad Salqiyniy rohimahulloh hazratlariga shogird tushganlar. Muhammad Avvoma dastlab 1952 yilda Umar ibn Abdulaziz nomli boshlang‘ich ta’lim maktabini tamomlaganlar. So‘ng o‘sha paytda usmoniylarning Halabdagi hokimlaridan biri Sha’bon poshoga mansub shariat madrasasiga o‘qishga kirganlar.1953 yilda birinchi ustozlari – fazilatli shayx Muhammad Salqiyniy rohimahullohning tavsiyasi bilan «Sha’boniya» madrasasiga o‘qishga kirganlar. Muhammad Avvoma bu madrasani 1962 yilda tamomlaganlar. Shayx Avvoma 1962 yilda Islom shariati kulliyotiga o‘qishga kirib, 1967 yilda o‘qishni tamomlagach, ustozlari shayx Abdulloh Sirojiddin hazratlari tavsiyasiga ko‘ra Sha’boniya madrasasida dars bera boshlaganlar. Shu yilning o‘zida uni ushbu madrasaga muallim va kutubxona boshlig‘i qilib tayinlashgan. 1979 yilda Suriyadan ketgunlariga qadar ushbu madrasada ta’lim berganlar. Shayx Muhammad Avvoma 1980 yilda Madinai munavvaraga ko‘chib o‘tganlar. U yerdagi Islom universitetiga joylashib, “Payg‘ambar alayhissalom sunnatlari va siyratlari” nomli bo‘lim ochganlar. Shayx Muhammad Avvomaning bir qator asarlari bo‘lib, ular bugungi kunda deyarli dunyoning barcha mamlakatlariga tarqalib ketgan:
• Umar ibn Abdulaziz. Musnad. Ushbu kitobning hadislari sharhlangan, rivoyatlarini mukammallashtirib, hadislarning roviylari yozib chiqilgan.
• Sam’oniy. Al-Ansob (asarning bir qismi sharhlangan).
• Hofiz Ibn Hajar. Taqrib at-Tahzib (tahqiq).
• Zahabiy. Al-Koshif.
• Ibn Nosiriddin ad-Dimashqiy. Majolis.
• Min sihohil-hadisil-qudsiyya.
• Al-muxtor min faroid an-nuqul val-axbor.
• Al-qavl al-badi’ fis-solati alal-Habib ash-Shafi’ sollallohu alayhi vasallam.
• Sharhu Sunan Abu Dovud (tahqiq va ta’liq).
• Imom Termiziy. Shamoili Muhammadiya (tahqiq)
• Ibn Abu Shayba. Musonnaf (tahqiq va taxrij, nasslar quvvatlangan. Ushbu asar o‘n olti yillik mehnat samarasidir).
• Dirosatu hadisiyya.
• Xutuvot al-manhajiyya.
• Rivoya al-hadis ash-sharif bilma’no.
• Maolim al-irshodiyya lisano’a tolib ilm.
• Hujjiyatu af’oli Rasululloh sollallohu alayhi vasallam usuliyyan va hadisiyya.
• Tadrib ar-roviy (tahqiq).
ESLATMA: Kuni kecha O’zbekistonda ilk bora “Qur’oni Karim ma’nolarining so’zma-so’z tarjimasi” chop etildi. Turkiya respublikasi Kavkaz davlat universiteti islomshunoslik fanlari bo’yicha falsafa doktori, filolog va islomshunos olim, Sardorxon Jahongir tomonidan birinchi marta Qur’oni Karim ma’nolari o’zbek tiliga so’zma so’z tarjima qilindi. Ushbu kitobni tayyorlashda Qur’oni Karim tafsiriga doir ko’plab asarlarga murojaat qilingan. Kitob taniqli olimlar, jumladan, dunyoga mashhur Shayx Muhammad Avvoma, O’zbekistonlik ulamo Shayx Abdulaziz Mansur hamda islomshunos olimlar Muhammadxon Jahongirov va Anvar Ahmad kabi olimlar taqrizidan o’tgan. Qur’oni Karim ma’nolarining so’zma-so’z tarjimasi ilm toliblariga, Qur’oni Karim lug’ati bo’yicha ilmiy izlanish olib borayotgan tadqiqotchilarga hamda barcha kitobxonlar ommasi uchun mo’ljallangan.
Ustoz Sayyid Sardorxon Jahongir va Shayx Muhammad Avvoma hafizahulloh.
Shayx Abdulaziz Mansur hafizahulloh va ustoz Sayyid Sardorxon Jahongir.
Ustoz Sayyid Sardorxon Jahongir va hadisshunos olim Muhammadxon Jahongirov
Ustoz Sayyid Sardorxon Jahongir va ustoz Anvar Ahmad hafizahulloh.
Xalqaro tashkilotning MATBUOT xizmati
