Faruqiy Xojalardan sanalgan Shayx Xovandi Tohur (Shayxontohur) hazratlarining Toshkentdagi avlodlariga qayta tasdiqlangan shajara va maxsus sertifikat topshirildi
“Turkiston Sayyidlari va Eshonlari” xalqaro tashkilotining mutaxassislariga Toshkent shahrida iste’qomat qiluvchi Abdujabbor Abdurazzoq hoji o‘g‘li murojaat etib, o‘zlarini Shayx Xovandi Tohur (Shayxontohur) avlodlaridan ekanliklarini ta’kidlashgan edilar. Shuningdek, ular ota-bobolaridan yozib olingan bir necha ajdodlarining nomlarini xalqaro tashkilotimiz mutaxassislariga tadqiq etish va qayta tasdiqlab berishni so‘rab murojaat etgandilar. Bizning nasabshunos naqiblarimiz taqdim etilgan ma’lumotlarni “Turkiston Sayyidlari va Eshonlari” xalqaro tashkilotining arxivida hamda dunyodagi bir necha hamkor Naqobat markazlarining qo‘lyozmalar xazinasida saqlanayotgan qadimiy qo‘lyozmalardagi nasabnomalar bilan solishtirgan holda tadqiq va tahlil etishga muvaffaq bo‘ldilar. Natijada Shayx Xovandi Tohur (Shayxontohur) va Shayx Umar Valiy Bog‘istoniy hazratlarining avlodlaridan sanalgan Abdujabbor Abdurazzoq hoji o‘g‘li oilasining shajarasini qayta tasdiqlashga musharraf bo‘lindi. Ushbu sulolaning sxema-jadval ko‘rinishidagi ona avlod va ota avlod shajara-plakatlari, rulon-shajaralari ham tayyorlandi. Qayta tasdiqlangan shajarada keltirilgan tarixiy ma’lumotlarni Sizlarga ham qisman havola etishni ma’qul ko‘rdik.
Bugun Toshkent shahridagi “TURON” ilmiy markazida “Turkiston Sayyidlari va Eshonlari” xalqaro tashkiloti raisi Doktor Sayyid Sardorxon Jahongir Jiyloniy hazratlari, tashkilot bosh kotibi Sayyid Sarvarxon Abdulqosimxon o‘g‘li hamda nasabshunos naqib Sayyid Ilhomxon Bahodir Razzaviy Husayniylar ishtirok etishdi. «Turkiston Sayyidlari va Eshonlari” xalqaro tashkiloti raisi Doktor Sayyid Sardorxon Jahongir Jiyloniy ishtirokchilarga Naqobat faoliyati haqida, shajarashunoslik va manbashunoslik to‘g‘risida qisqacha ma’lumot berib o‘tdilar. Suhbat yakunida Faruqiy xojalardan bo‘lgan eshonbobolarga - Abdujabbor Abdurazzoq hoji o‘g‘li va Abdujalol Abdujabbor o‘g‘illariga xalqaro miq’yosda qayta tasdiqlangan shajara-plakatlari, rulon-shajaralari va maxsus sertifikat taqdim etildi. Taqdimotdan so‘ng mazkur sulolaning ulug‘ bobokalonlari ruhi poklariga va hozirgi avlodlari haqqiga duolar qilindi.
"Turkiston Sayyidlari va Eshonlari" xalqaro tashkiloti, MATBUOT XIZMATI
