Yassaviya tariqati murshidi Zangi ota (q.s.)ning ikkinchi xalifasi avliyo Hazrati Sayyid Ota (q.s.) avlodlarining shajarasi xalqaro miqyosda tasdiqlandi
Markaziy Osiyo va O’zbekistonda o’z faoliyatini olib borayotgan “Turkiston Sayyidlari va Eshonlari” xalqaro tashkilotining nasabshunos mutaxassislariga Sayyid Bobosaid eshon sulolasidan bo’lgan Toshkent viloyatida iste’qomat qiluvchi Sayyid Karim Bobosaidov murojaat etib, o‘zlarini Yassaviya tariqati murshidi Zangi ota (q.s.)ning ikkinchi xalifasi bo’lgan mashhur avliyo Hazrati Sayyid Ota alayhirrahmaning avlodlaridan ekanliklarini ta’kidlashgan edilar. Shuningdek, ular ota-bobolaridan yozib olingan avlodnomalarini tashkilotimiz mutaxassislariga tadqiq va tahlil etish va xalqaro miqyosda tasdiqlab berishni so‘rab murojaat etgan edilar.
Bizning nasabshunos naqiblarimiz taqdim etilgan ma’lumotlarni “Turkiston Sayyidlari va Eshonlari” xalqaro tashkilotining qo’lyozmalar arxividagi hamda ilmiy hamkorlarimiz bo’lgan dunyodagi bir necha «Naqobat Sadat al-Ashraf» markazlarida saqlanayotgan qadimiy qo‘lyozmalardagi nasabnomalar hamda ansob (nasab) ilmiga oid manbalar bilan solishtirgan holda tadqiq va tahlil etdilar. Natijada Sayyid Amir Ali Nuriddin al-Akbar ibn Sayyid Imom Muhammad Kabir al-Askariy al-Javhariy ibn Imom Ali Naqiy (Hodiy)ning avlodi bo’lgan Hazrati Sayyid Ota (Sayyid Ahmad Solih ibn Sayyid Amir Hasan) alayhirrahmaning xalqaro miqyosda Yaqin Sharq mamlakatlaridagi yigirmaga yaqin nufuzli «Naqobat Sadat al-Ashraf» markazlarining naqiblari tomonidan tan olingan va “sahihun nasab” deb topilgan nasabnomasi aniqlandi hamda mazkur sulolaga mansub bo’lgan Bobosaidov Sayyid Karim oilasining nasab shajarasini xalqaro darajada tasdiqlashga musharraf bo‘lindi. Ushbu sulolaga yangitdan tuzilgan rulon (o’rama) shajaralar tayyorlandi. Qayta tasdiqlangan shajarada bayon etilgan tarixiy ma’lumotlarni Sizlarga ham qisman havola etishni ma’qul ko‘rdik:
suratda: Hazrati Sayyid Otaning qabri joylashgan "Sulaymon Boqirg‘oniy" maqbarasi (Mo'ynoq tumani)
Bugun poytaxtimizdagi “Turkiston Sayyidlari va Eshonlari” xalqaro tashkilotining bosh ofisida mazkur sulola vakillari ishtirokida taqdimot bo’lib o’tdi, unda dr.Sayyid Sardorxon Jahongir Jiyloniy hazratlari, tashkilot kotibi Sayyid Sarvarxon qori hamda tashkilot xodimlari ishtirok etdilar. Xalqaro tashkilot raisi dr. Sayyid Sardorxon Jahongir Jiyloniy ishtirokchilarga naqobat faoliyati haqida, shajarashunoslik va manbashunoslik to‘g‘risida hamda mashhur avliyo Hazrati Sayyid Ota rahmatullohi alayhining ulug’ ajdodlari haqida ishtirokchilarga ma’lumotlar berib o’tdilar.
Shuningdek, suhbat yakunida sayyidatoyi sayyidlardan bo‘lgan Sayyid Rasul o’g’li Sayyid Karim eshonboboga xalqaro miqyosda tasdiqlangan rulon (o’rama) shajaralari va maxsus sertifikat taqdim etildi. Taqdimotdan so‘ng mazkur sulolaning ulug‘ bobokalonlari ruhi poklariga va hozirgi avlodlari haqqiga duoi fotihalar qilindi.
dr. Sayyid Ilhomxon Bahodir Razzaviy Husayniy, “Turkiston Sayyidlari va Eshonlari” xalqaro tashkilotining azosi, ansobshunos, manbashunos, naqib al-ashraf.
