O’zbekiston va Markaziy Osiyoda taniqli bo’lgan ulamo Sayyid Sirojiddinxon (Jahongirov Sirojiddin domla) rahimahullohning o’g’li, taniqli ahli ilmlardan bo’lgan ustoz Sayyid Muhammadxon Jahongir bilan ilmiy uchrashuv bo‘lib o‘tdi

Yurtimizda taniqli ahli ilmlardan bo’lgan islomshunos va hadisshunos olim, "Turkiston Sayyidlari va Eshonlari" xalqaro tashkilotining muassislaridan biri, ustoz Sayyid Muhammadxon Jahongir xalqaro tashkilotimizning bosh ofisiga tashrif buyurdilar. U kishini xalqaro tashkilotimiz raisi islomshunos olim Sayyid Sardorxon Jahongir hamda tashkilotimizning ilmiy jamoasi kutib oldilar.

Mazkur uchrashuvda ustoz Sayyid Muhammadxon Jahongir tashkilotimizning O’zbekiston va Markaziy Osiyoda olib borayotgan shajarashunoslik-manbashunoslik sohasidagi ilmiy-tadqiqotlari bilan va tahririyat-nashriyot yo’nalishida amalga oshirilgan ishlar hamda bu sohalardagi istiqbolli rejalar bilan tanishib chiqdilar. Jumladan, yurtimizda birinchi marta nashr etilgan QUR’ONI KARIM ma’nolari o’zbek tiliga so’zma so’z tarjimasi yuzasidan va boshqa rejadagi ilmiy ishlar bo’yicha o’z fikr-mulohazalarini bildirdilar. Shuningdek, shajarashunoslik-manbashunoslik naqobat faoliyatini olib borish, Markaziy Osiyo xalqlari orasida oilaviy shajaralarni keng tarqatish, qadimiy qo’lyozma shajaralarni tadqiq va tahlil etish, ularni xalqaro darajada qayta tasdiqlash va keng jamoatchilik orasida tar’gibot ishlarini olib borish yuzasidan fikr-mulohazalar va takliflarni bildirdilar. Ilmiy suhbat yakunida ushbu xayrli ishlar xalqimizga manfaatli bo’lishini so’rab duoi fotihalar qilindi.

Ma'lumotnoma:

Ustoz Muhammadxon Jahongir diyorimiz va Markaziy Osiyoda taniqli bo’lgan ulamo Sayyid Sirojiddinxon Jahongir rahimahullohning to’ng’ich farzandi hisoblanadilar. Shu o’rinda, Sayyid Sirojiddinxon Jahongir (Sirojiddin domla Jahongirov)ning ota-bobolari haqida, hayotlari va faoliyatlari to’g’risida ma’lumot berib o’tsak:

Sayyid Sirojiddinxon Sayyid Burhoniddinxon o’g’li (Sirojiddin domla Jahongirov (1945-2009)

Sayyid Burhoniddinxon (1920-1977) ibn Sayyid Jahongirxon Eshon Piri Zanjirband (1872-1937) xonadoni Toshkentning ziyoli, ma’rifatli xonadonlaridan bo’lgan. U kishining otasi Sayyid Jahongirxon Eshon Piri Zanjirband Samarqandiy Toshkandiy ibn Sayyid Haydarxon bo’lib, asli Samarqandlik eshonlardan edilar. Sayyid Haydarxonning to’rt o’g’li bo’lgan, ular - Sayyid Faqirxon, Sayyid Salmonxon, Sayyid Abbosxon va eng kenjasi Sayyid Jahongirxon Samarqandiy Toshkandiy edilar. Sayyid Jahongirxon Eshonning Sayyid Amir Hamzaxon (1913-1981), Sayyid Burhoniddinxon (1920-1977), Sayyid Asrorxon, Muhibaxon va Muborakxon ismli farzandlari bo’lgan. Sayyid Amir Hamzaxonning farzandlari Sayyid Abulqosimxon (1946-2021, ahli ilm va tariqat peshvosi, manbashunos, ansobshunos naqib, yurtimizdagi ko’plab masjidlarni bunyod etilishida saxovatpeshalik va jonbozlik ko’rsatganlar), Abulhoshimxon, Abulmuzaffarxon, Tursunoyxon, Bashoratxon va Malohatxon ismli farzandlar dunyoga kelgan.

Sayyid Abulqosimxon Jahongirovning farzandlari: Diloromxon (1974), Sayyid Sardorxon Jahongir (1977 y.t. “Turkiston Sayyidlari va Eshonlari” xalqaro tashkiloti raisi, islomshunos va manbashunos olim), Sayyid Sarvarxon (1980 y.t. hofizi Qur’on, murattab qori), Dilovarxon (1982), Sayyid Sanjarxon (1984).

suratda: Sayyid Amir Hamzaxon oilasi hamda Sayyid Abbosxonning rafiqasi Sayyida Saboxatxon qozikalon Muhammad Isoxonxoja Sadr Musaviy Razzaviy Samarqandiy qizi o'z oilasi bilan, Toshkent shahri 1950 y.

suratda: Sayyid Abulqosimxon Hamzaxon o’gli

Ushbu sulolaning nasab shajarasi avlodlarida saqlanayotgan qadimiy qo'lyozma shajaralar va avlodnomalarga asosan Hazrati Sayyid Mir Baraka (Amir Temurning piri) orqali G’avsul A’zam Shayx Abdulqodir Jiyloniy hazratlariga va u zot orqali Sarvari olam Hazrati Muhammad alayhissalomning ahli baytlariga borib tutashadi.

suratda: Sulolaga tegishli qadimiy qo’lyozma nasab shajarasi

suratda: Qodiriyya irshod hujjati

Mazkur sulolaning qadimiy qo’lyozma shajarasi hamda ijozatnoma irshod hujjatlari bobolaridan avlodlarigacha yetib kelgan bo’lib, ularda Shayx Abdulqodir Jiyloniy hazratlarining nasablari “sahih un-nasab” ya’ni chin pokiza nasabli va Hasaniy-Husayniy “sayyid ut-tamom” ya’ni ikki tomonlama sayyid - ota tomondan Imom Hasan (r.a.)ga, ona tomondan Imom Husayn (r.a.) ibn Hazrati Ali (k.v.)ga bog‘lanishi bayon etilgan. Shuningdek, Sayyid Jahongirxon Eshon Piri Zanjirband Samarqandiy Toshkandiy diyorimizda Yassaviya va Xojagoni Naqshbandiya tariqatlari singari mashhur bo’lgan Qodiriyya tariqati piri G’avsul A’zam Shayx Abdulqodir Jiyloniy (q.s.) sulukining davomchisi, murshidi hamda irshod sohibi edilar. 1937 yilda bu ulug’ zot ham boshqa sayyidlar, xo’jalar va eshonlar singari qonxo’r Sho’ro hukumatining qatag’on siyosati qurboniga aylangan.

Sayyid Burhoniddinxon ana shunday ulug’ zotlarning avlodlaridan edilar. U kishi farzandi arjumandi Sayyid Sirojiddinxonni ham bolaligidan ana shu sharafga munosib inson qilib tarbiyaladilar, unga islomiy bilimlarni o‘rgatishga astoydil harakat qildilar. Sayyid Sirojiddinxon boshlang‘ich diniy ilmlarni padari buzrukvorlaridan oldilar. Otalari u kishini Qur’oni Karimni yod olishga rag‘batlantirdilar. 1969 yili o‘rta maktabni tamomlagan Sayyid Sirojiddinxon Buxorodagi mashhur Mir Arab madrasasiga o‘qishga kiradilar. Maktab yillaridayoq diniy ilmlarni puxta o‘rganlari bois madrasada qiynalmay tahsil oladilar va 1976 yili madrasani muvaffaqiyatli tugatadilar.

suratda: Mir Arab madrasasi (Buxoro)

Sayyid Sirojiddinxon iqtidorli, salohiyatli va o’z ustida ishlaydigan tirishqoq yoshlardan bo‘lgani uchun Mir Arab madrasasidagi o‘qish bilan kifoyalanib qolmadilar. 1976-1980 yillarda Imom Buxoriy nomidagi Toshkent Islom institutida tahsil olib, oliy ma’lumotli islomshunos mutaxassis bo‘lib yetishdilar. Talabalik yillaridayoq O‘rta Chirchiq tumanidagi «To‘ytepa» jome’ masjidida imom-xatiblik qilishni boshlab yubordilar. Sayyid Sirojiddinxon domla o‘sha davrning mashhur allomalaridan ham tahsil oldilar, xususan, Alixon to‘ra Sog‘uniy hazratlarining uylarida uzoq yillar sodiq shogird bo’lib xizmat qildilar, to vafotlarigacha u kishida tahsil oldilar. Shuningdek, Shahobiddin qori domla, Lazgin domla (Sirojiddin domla), Do‘stmuhammad domlalardan ham ta’lim oldilar. 1980 yillardan boshlab Sayyid Sirojiddinxon domla Jahongirov O‘rta Osiyo va Qozog‘iston musulmonlari diniy boshqarmasi tizimida ishlay boshladilar. Diniy boshqarmada yetakchi xodim, boshqarma qoshidagi “Movarounnahr” nashriyotida bo‘lim mudiri va muharrir, “Tilla Shayx jome’” masjidida mutavalli vazifalarida ishladilar. Toshkent shahrida “To‘xtaboy” jome’ masjidi qayta ochilgach, Sayyid Sirojiddinxon domla unga mutavalli etib tayinlanganlar. 1996-1999 yillarda esa Chorsu dahasidagi “Shoh Aziz Avliyo” masjidiga imom-xatib bo‘ldilar.

Yillar davomida boy tajriba to‘plagan Sayyid Sirojiddinxon domla mudarrislik sohasida ham jonbozlik ko‘rsatib, islom ta’limotiga ko‘p xizmatlar qildilar. 1992-1993 yillar mobaynida Toshkentdagi “Abulqosim” madrasasida, 2000-2008 yillarda “Ko‘kaldosh” madrasasida yoshlarga arab tilining sarfi va nahvidan, Qur’oni karim tafsiridan dars berdilar. Sayyid Sirojiddinxon domla Shayx Muhammad Sodiq Muhammad Yusuf rahimahullohning eng yaqin do’stlari edilar. “Ko‘kaldosh” madrasasi binosida Sayyid Sirojiddinxon domlaning alohida hujralari bo‘lib, u yerdan odamlar uzilmas edi. Goh talabalar tushunmay qolgan darslarini so‘rab kirishar, goho biror diniy masalada yechim topa olmay qolgan kishi u zotdan maslahat so‘rash uchun eshik tagida navbat kutayotgan bo‘lar edi. Ko‘pincha ziyolilar bilan shirin suhbatlar boshlanib ketar, torgina hujra ma’rifat ishqibozlariga to‘lib ketar edi.

suratda: Ko’kaldosh madrasasi, Toshkent sh.

Sayyid Sirojiddinxon domlaning ko‘plab ilmiy maqolalari «Hidoyat» jurnalida, «Islom nuri» gazetasida chop qilingan. Bundan tashqari, Sayyid Sirojiddinxon domla Jahongirov 1992-1993 yillarda efirga uzatilgan Payg‘ambarimiz Muhammad alayhissalomning siyratlari haqida hikoya qiluvchi «Sarvari olam», 1993-1994 yillarda efirga chiqqan Islomda poklik va halollik masalalariga bag‘ishlangan «Poklik iymondandir», Alloh zikrining qalb xastaliklariga shifo bo‘lishi haqida «Dil shifosi» turkumidagi 1998-2005 yillarda e’lon qilingan diniy-ma’rifiy eshittirishlarning muallifi ham bo’lganlar. Sayyid Sirojiddinxon domla 1990 va 1992 yillari muborak haj safarini ado etganlar.

Turkiyada yashab turgan farzandlari va nabiralarini ko‘rgani borgan taniqli din olimi, mudarris, ma’rifatparvar inson Sayyid Sirojiddinxon domla Jahongirov 2009 yilning 13 iyunida Istanbul shahrida vafot etadilar va o‘sha yerda dafn qilinadilar.

Sayyid Sirojiddinxon domla farzandlarini ham dini islomga kamarbasta ahli ilmdan qilib tarbiyalaganlar. To‘ng‘ich o‘g‘illari Sayyid Muhammadxon Jahongir islomshunos va hadisshunos olim bo‘lib, Misrdagi «Al-Azhar» jome’asini tamomlaganlar. Bir necha yil Toshkent islom institutida tolibi ilmlarga ta’lim berib, ko’plab shogirdlarni yetishtirganlar. U kishi "Turkiston Sayyidlari va Eshonlari" xalqaro tashkilotining asoschilaridan biri hisoblanadilar. Hozirda Turkiya davlatida istiqomat qilib, hadisshunoslik bo’yicha ilmiy ishlar olib bormoqdalar. Sayyid Sirojiddinxon domlaning ikkinchi o‘g‘illari Sayyid Zikrullohxon ham Misrda tahsil olgan, ilm dargohlarida ustozlik qilib, bir necha shogirdlar yetishtirganlar. Domlaning to‘rt qizlari, o‘ndan ziyod nabiralari ham dini islomga kamarbasta insonlar bo‘lib yetishishgan, o‘sib kelayotgan yosh avlodlari esa Qur’on va hadis ilmlarini qunt bilan o‘rganib kelishmoqda.

suratda: Hazrati Sayyid Mir Baraka avlodi naqib Sayyid Abulqosimxon eshonbobo qarindosh shogirdlari Sayyid Ilhomxon Bahodirga ansobshunos-naqiblikda ijoza va duoi fotiha bermoqdalar , Toshkent, 2021 y.

Alloh o’tgan bu ulug’ zotlarning ruhlarini shod va oxiratlarini obod aylasin! Farzandlari va nabiralarini ilmu amallariga rivoj, umrlari va kasbi korlariga xayru barakotlar ato qilsin!