МУҚАДДАС ҚАДАМЖОЛАР ЗИЁРАТИ ВА ХАЛҚАРО ҲАМКОРЛИК: САЙЙИДЛАР ВА ЭШОНЛАР АЛОҚАЛАРИ ЯНГИ БОСҚИЧДА

«Туркистон Саййидлари ва Эшонлари» халқаро ташкилоти раиси Доктор Саййид Сардорхон Жаҳонгирнинг муқаддас Макка шаҳрига қилган зиёрати ҳам маънавий, ҳам амалий жиҳатдан муҳим воқеаларга бой бўлди. Бу сафар асрий қадриятларни тиклаш, кенг жамоатчиликни бирлаштириш ва халқаро алоқаларни янги босқичга кўтариш йўлидаги салмоқли қадамлардан саналади.

Ташкилот фаолияти ва маънавий мерос

Ҳозирги кунда ташкилот томонидан аждодларимиз қолдирган бой маънавий-маърифий меросни ўрганиш, уни келажак авлодларга безавол етказиш борасида кенг кўламли ишлар амалга оширилмоқда. Хусусан, тарихий манбаларни илмий асосда тадқиқ этиш, турли ҳудудлардаги саййидлар ва эшонлар авлодлари ўртасидаги дўстона ҳамда илмий алоқаларни мустаҳкамлаш ташкилотнинг асосий устувор вазифаларидан биридир.

Доктор Саййид Сардорхон Жаҳонгирнинг мазкур сафари давомида Саудия Арабистони, Яман, Судан ва Бирлашган Араб Амирликларидан ташриф буюрган нақиблар ва саййидлар авлодлари билан муҳим учрашувлар бўлиб ўтди. Ислом оламининг мазкур нуфузли давлатларидан келган етакчилар ва диний-маърифий доира вакиллари билан ўтказилган музокаралар чоғида қуйидаги йўналишларда фикр алмашилди:

• Саудия Арабистони, Яман, Судан ва Бирлашган Араб Амирликларидаги саййидлар ва нақиблар институти фаолияти билан яқиндан танишиш ҳамда уларнинг бой тажрибасини ўрганиш.
• Туркистон минтақаси ва араб дунёси ўртасидаги тарихий-илмий алоқаларни жонлантириш, қўлёзмалар ҳамда ноёб манбаларни тадқиқ этиш бўйича шерикликни йўлга қўйиш.
• Ислом оламида тинчлик, бағрикенглик ва маънавий қадриятларни тарғиб қилиш борасидаги қўшма ташаббусларни муҳокама қилиш.

Шажаралар тақдимоти ва топшириш маросими

Зиёрат ва муҳим халқаро учрашувлар доирасида яна бир эътиборга молик тадбир – илмий тадқиқотлари тўлиқ якунига етказилган шажараларнинг тақдимоти ва эгаларига топшириш маросими бўлиб ўтди. Миллат ва авлодлар тарихини тиклаш, асрлар оша сақланиб келган шажараларни илмий асосда чуқур ўрганиш жамиятда маънавий барқарорликни таъминлаш ҳамда тарихий хотирани асрашда муҳим ўрин тутади. Тадбир якунида тадқиқоти якунланган шажаралар ўз эгаларига топширилиб, келажакда бу йўналишдаги илмий изланишларни янада кенгайтириш бўйича келишувларга эришилди.

Халқаро алоқаларни онлайн форматда кенгайтириш

Мазкур сафар ва учрашувлар доирасида фаолият кўлами янада кенгайиб, дунёнинг бошқа қатор етакчи давлатлари – Покистон, Афғонистон, Эрон ва Туркия каби мамлакатларнинг нақиблари ҳамда нуфузли вакиллари билан онлайн форматдаги муҳим мулоқотлар ташкил этилди. Замонавий ахборот технологиялари имкониятларидан фойдаланган ҳолда ўтказилган мазкур онлайн учрашувларда қуйидаги вазифалар белгилаб олинди:

• Покистон, Афғонистон ва Туркиядаги саййидлар ҳамда нақиблар институти фаолият юритаётган марказлар билан тажриба алмашиш ва ҳамкорлик алоқаларини ўрнатиш.
• Миллий-тарихий илдизларни ўрганиш, қўлёзма фондлари ва архив ҳужжатлари борасида маълумот алмашинув йўналишларини шакллантириш.
• Минтақалараро маънавий-маърифий лойиҳаларни амалга ошириш ҳамда келажакдаги қўшма ташаббусларни келишиб олиш.

Доктор Саййид Сардорхон Жаҳонгир томонидан амалга оширилган мазкур хайрли сафарлар ва халқаро мулоқотлар саййидлар ва эшонлар авлодлари ўртасидаги дўстона ҳамда илмий кўприкларни глобал миқёсда мустаҳкамлашга хизмат қилади.